هل منطقى؟! - مريم عبد الجابر
هل منطقى إن المجتمع اللى فيه الراجل بـ ينادى على مراته باسمه علشان "ما يصحش" وعلشان احنا مجتمع بطبعه محافظ، يبقى نفس المجتمع اللى فيه جمهور كامل فى استاد بـ يشتم لعيب كورة بأمه وبـ ينادوه باسمها نظرا لسوء أدائه أو تصريح ما أو انتقاله من نادى لآخر؟
لما إبراهيم حسن وحسام حسن كانوا بـ يشاوروا "بصباعهم" للجماهير ردا على شتيمتهم بأمهم... أمى كانت بـ تقول إن دى قلة أدب!
بس دى مش قلة أدب، ده حقهم فى الرد على شتيمة أمهم...جدع يا حسام
جدع يا هيما
بس مش جدع يا باشامنطقى إن ظابط فى بلاد زى بلادى ينشن جوا عين بنى آدم، بس هل منطقى إن بنى آدم يشوف إن دى جدعنة؟ يعنى لو كان الظابط سأله "إيه رأيك يالا؟!"، كان يبقى مضطر يرد كده ...هو قال كده علشان هو شايف كده ... هل منطقى إن بنى آدم يشوف إن فقع عين بنى آدم تانى ... جدعنة؟
من ضمن الجدعنة إنك تبقى جدع فى شغلك، تشغل مخك وتطلع بأفكار فعّالة وجديدة ... يا ترى أصحاب فكرة الصور اللى على علب السجاير عارفين كده؟
هل منطقى منظر الصور اللى فى وشنا دى حتى لو مش بـ نشرب سجاير؟ ما عرفوش يفكروا خالص فى أى وسيلة تانية تكره المدخن فى السيجارة غير الصور اللى بـ تكره بس فى منظر العلبة؟ أساسا ما عرفوش إن نسبة إن مدخن يبطل سجاير بسبب صورة هى صفر؟! ما كانوا بطلوها من اللى ماتوا قبلهم!البرجر بـ يموّت من الدهون ...والشغل بـ يموّت من الضغط العصبى ...والحسرة بـ تموّت ...وممكن تموت وانت قاعد مكانك وكلك صحة وسعيدالموت قدر!لكن هل منطقى إن عيال صغيرين يموتوا غدر فى ماتش كورة؟
وهل منطقى إن ناس بعد صلاة الجمعة تنقسم فريقين بين مؤيد لتكفير الخطيب للاعبى الكورة وبين معارض للخطيب والدفاع عن الكورة ولاعبيها؟ هل من المنطقى أساسا إن ده يبقى موضوع خطبة صلاة الجمعة؟
أخويا آخر مرة صلى الجمعة كان من حوالى 6 سنين ...هل منطقى إن أخويا ... الشخص اللى علمنى أقرا روايات مش بس كتب المدرسة المملة، واللى علمنى أكتب مش بس الواجب لأ أكتب زيه اللى أنا حساه، واللى علمنى أطير طيارة مع وعده لو اتقطعت هـ يروح يجيب لى غيرها، واللى علمنى أرد على اللى يحرجنى ازاى، واللى علمنى إن "سياسة المدى الطويل" أحيانا هى الحل، واللى استنى معايا فى المرواح علشان أشاور له على الولد اللى ضايقنى فـ يجيب لى حقى منه، واللى علمنى أدخل online وأعمل ICQ لنفسى، واللى علمنى أسوق عجلة بعد ما أبويا فقد الأمل واللى علمنى أسوق عربية بعد ما الكل فقد الأمل ... يبقى نفس الشخص اللى بقالى سنين مش بـ اعرف أعمل حوار معاه يدوم أكثر من ربع ساعة؟!
الناس بـ تتغير ... بـ تتغير أوى!هل منطقى الشخص اللى كنت معاه يصاحب صاحبتى بعدى بشهرين؟لا شىء يخذلنى ولا يحبطنى بقدر تصرفات الناس...
بس نعيش ننسى الناس بالناس...
هل منطقى إن أم فى عزا بنتها تفتكر هى وصاحبتها أيام ما كانوا بـ يطلعوا إسكندرية وإن ما كانش فيه زيهم فى عمايل المحشى؟الموت قدر!الحياة لازم تمشى ...لكن الحداد واجب، مظاهر الحداد لازمة.بس دقيقة حداد...؟!عمرى ما اقتنعت بأنى لما أقوم أقف حدادا على حد ده فيه أى نوع من أنواع أى حاجة! بـ تجنب الموضوع لو أقدر أتجنبه، بس لو مضطرة بـ قوم أقف من غير إحساس!فيه حاجات بـ تبقى مُجبر عليها ولازم تعملها ... فبـ تعملها من غير إحساس.وفيه حاجات بـ تبقى مُجبر عليها ولازم تعملها ... بس ما ينفعش تعملها من غير إحساس ... زى الصلاة.أركان الإسلام خمسة ... الحجاب مش من ضمنهم!فرض إنما مش ركن ... ربنا الأعلم والأبلغ كان قادر إن يضعه كركن للنساء زى ما وضع الحج لمن استطاع.هل منطقى واحدة تيجى لى وانا بـ شيل حجاب بعد ما خلصت صلاة جنازة وتقول لى "لأ لأ ليه! حرام ليه؟ يا بنتى صلاتك كده ما اتحسبتش؟"قلت لها: "معلش"هل منطقى إن رجل الدين يبقى شكله مرعب كده، صوته يخوف كده، حجته ضعيفة كده، معتمد على الترهيب وبس؟
أنا مش خايفة من ربنا ... أنا بحبه!أنا مش عايزة أغضب ربنا مش طمعا فى الجنة ولا خوفا من جهنم ... ده علشان أنا بحبه!الحب وحده لا يكفى أحيانا ... أنا عارفة وغلطانة وآسفة!هل منطقى تفتح باب الكوافير واحدة وتصرخ فرحا: "باركوا لى! أنا خلاص اتطلقت"؟هل منطقى أن أبوها ما رضيش يطلقها إلا لما جالها جلطة فى المخ من الهم؟الإحساس نعمة ... والإحساس بقى نادر!اللسان النضيف بقى موهبة!هل منطقى أن شخص يستغربنى ويلومنى لأنى فى كلامى ما بشتمش ويحاول يقنعنى ان الشتايم عادى لأنها "لغة الشارع" ؟أنا أحتك بالشارع، أنزل له بفكرى علشان أفهمه، أكتب لى وأكتب عنه، إنما أنا أتكلم "بألفاظ الشارع" فى حياتى الشخصية ليه؟ هو أنا كنت أتربيت فى الشارع علشان أتكلم بألفاظ الشارع؟ أنا لحد إعدادى كنت بـ اتعاقب علشان وصفت شىء أو شخص بأنه "معفن" ، أجى دلوقتى أتكلم بلغة الشارع؟التفهم مهم ...لو واحدة جت قالت لى إنها حامل من صاحبها، هـ تفهم، هـ ساعدها... كلنا بـ نضعف وبـ نغلط.بس الاحتواء أهم ...أهم حاجة فى العالم هو الاحتواء وخصوصا فى العلاقات العاطفية ... بس هو "شاحح"!"وكأن رجال العالم صارت تعجز عن تلك المهمة المقدسة...ألا وهى الأحتواء" – ياسمين زهدىمشكلة هذا العالم إن الشاطر شاكك إنه شاطر، واللى مش شاطر واثق من شطارته وشغال فى دماغ الناس حلاوة!هل منطقى إن كاتب شاب مرموق عنده كتابين محققين نجاح كويس فى السوق وله رأى مسموع عند الشباب يكتب على التويتر بتاعه "فيه فرق بين التحرش وبين المجاملة الرقيقة"؟!أيوا صح! أصل التحرش لفظيا وجسديا له أثر نفسى بشع! إنما المجاملة الرقيقة عادى طبعا بـ ترفع من روحى المعنوية ... أمشى أنا فى الشارع ده يقول لى "إيه الشعر الحلو ده؟"، والتانى يقول لى "أدفع فى مهرك ألوف"، وواحد يقول لى "والنبى لهطة القشطة" وكل واحد بقى ومقياس "الرقة" عنده بالنسبة لمستوى ثقافته وتربيته!أنا مش عايزة مجاملة رقيقة ولا غير رقيقة من حد ما أعرفوش ...أنا عايزة أمشى فى الشارع محترمة نفسى وفى حالى، والكل يحترم إنى محترمة نفسى وفى حالى.وفر المجاملة الرقيقة لمراتك ... ولا انتم تعاكسوا فى الشارع وتجيبوا لمراتاتكم جلطات فى البيوت؟!"جوا القلوب ... والذكريات ... ما يعيش غير طعم البيوت"هل منطقى "تحقّروا" من قيمة فنان عالمى زى محمد منير علشان عمل إعلان اتصالات وبعدها عمل إعلان ڤودافون؟ الراجل اللى بقاله 30 سنة بـ يغنى للحياة وللأمل وللفرص وللحب والعشق والبحر وللناس وللبيوت ولبكره، فى يوم واحد بس بقى بتاع فلوس ومش صاحب مبدأ؟هل منطقى امبارح نبقى هـ نشيل حسن شحاته فوق دماغنا علشان جاب لنا كاس؟ والنهارده نبقى خلاص هـ نخطط نغتاله من الغل؟بـ ننسى بسرعة ... بسرعة أوى!لا لا عندك حق! هم ما احترموش تاريخهم ولا نفسهم ... تحترمهم انت ليه؟ بـ تفكر كده؟ انت من النوع ده؟ طيب أرجوك افتكر فى حياتك الشخصية لما تعيش عمرك كله كويس مع شخص ما وتدى له على قد ما تقدر وتيجى تغلط مرة فى فكر أو رأى! ويقرر هذا الشخص إنه يخرجك برا حياته للأبد ويستحقرك ويشوفك مسخ مشوه وما يفتكرلكش حسنة واحدة! ساعتها، ما تبلمش، ما تتنحش، ما تقولش ده ظلم! ده مش ظلم! ما أصل انت اللى غلطت وما احترمتش نفسك!الاحترام مهم، بس الاحتواء أهم ... من خطوات احتواء بعض المواقف هو الاعتذار بطريقة مباشرة.هل منطقى إنك تغلط فيا وما تعتذرش؟هل منطقى إنك تشوفنى سخيفة لمجرد إنك جيت تتكلم معايا وانت غلطان فيا من غير ما تعتذر فانا ما أكونش أنا معاك؟ثقافة الـ "معلش" لازم يحل محلها ثقافة أنا آسف ...الوش والمعلش ... ده اسم عرض أنا حضرته، فى "مخلوف" بـ يرسم بورتريه لشخص "أنديل" بـ يجرى حوار معاه ...أنديل: نفسك تحققى إيه قبل ما تموتى؟أنا: "نفسى آخد Oscar "
أنديل: فى إيه طيب؟أنا: فى الـ Screen Writingهل منطقى يطلع الشخص اللى بعدى -كاتب سيناريو (محمد إسماعيل) - يقول إنه ما شافش ست بـ تكتب حلو قبل كده؟ وإن كل الكتابات النسائية بـ تتمحور حوالين قهر الرجل لها؟!أهو ده مش منطقى، لأن التعميم من أهم عوامل الوقوع فى خطأ التفكير، ولأن فى مصر فيه واحدة اسمها "مريم نعوم" كتبت فيلم اسمه "واحد صفر"، ولأن فى لبنان فيه واحدة كتبت ومثلت وأخرجت فيلم اسمه "وهلأ لوين؟" أتمنى يكون الأستاذ محمد شافهم.عمرى ما تحمست لقضية المرأة ... آه وربنا!
مفيش حد مالوش إيد فى قهره، علشان تلاقى ظالم لازم يكون فيه اللى رضى بالظلم.عقلاء الوطن دى إيه؟ وظيفة؟ طب بما إنهم كتير أوى الفترة دى، ياريت يهتموا بأخلاق الوطن مش بالشهرة على أفا الوطن!الوطن معنى إنسانى بالفطرة محسوس ومفهوم ... باين عظمته فى نطقه ... "وطن"!هل منطقى إنك تحارب وتقتل وتأسر وتصرف على أسلحة وذخيرة من أجل "الوطن"؟مايكل چوردون اتطرد من فريق الباسكت فى مدرسته علشان "مش بـ يعرف يلعب"والت ديزنى اتطرد من كذا شغل علشان "خياله مش واسع"توماس إيديسون اترفد من مدرسته بعد 3 شهور بس نظرا "لأنه غبى ومتأخر عقليا"!هل منطقى إن حد يُـصر يحدد قدرات غيره بعد ما يسمع القصص دى؟هل منطقى إن ييجى كابتن رياضى فى نادى يقول على بطلة بـ تحاول تدخل الأوليمبياد أنها مش مؤهلة وقدراتها غير لائقة؟
القصص كتير بس للى عايز يسمع ...الدروس كتير بس للى عايز يتعلم ...هل منطقى إن يقف عضو فى مجلس الشعب بتاع بلدى يقول إن تعليم اللغة الإنجليزية ده مخطط خارجى؟هل منطقى يقوم عضو مجلس شعب يأذن فى وسط الجلسة؟هل منطقى كل اللى بـ نشوفه وبـ نسمعه فى مجلس الشعب كل جلسة؟بس قبل ما ألوم عليهم ... ألوم على اللى انتخبهم!مفيش فقر قد الفقر الفكرى ...يلعن أبو الجهل مليون مرة!هل منطقى إن الولد اللى واقف صيدلى الصبح، أدخل بالليل محل حلويات ألاقيه هو اللى بـ يلف علب الجاتوه، فى حين إن فيه غيره فى سنه أقصى همه يغير الـ BMW بتاعته علشان قرفاه اكمنها واطية على الأرض ومش بـ يقدر يصحى الصبح شغله بدرى، وبابا وماما لسه قايمين بالواجب؟
الواجب مش إنك تعمل اللى عليك ...واجبك هو إنك تعمل أزيد من اللى عليك بكتير ...واجب أهلك عليك ينتهى بمجرد خروجك للحياة العملية، طالما بدأتها فيبقى أى نصيحة بـ يدوها لك، أى قرش بـ يصرفوه عليك، أى وقت بـ يضيعوه معاك، كرم أخلاق وضمير زايد منهم، مش حق مكتسب ...الحق اللى لازم يبقى مكتسب هو حق كل مواطن فى إنه يعيش بكرامته ...هل منطقى تقف مغنية قدام ميكرفون فى استوديو مقفول وتغنى: "عينه من عينى وأنا قلبى ياعينى مشغول أوى مش هـ يهدا؟ أومبلأ ... أومبلأ ... أنا أوبلأ لأه ه ه"؟!!
طب أومبلأه لإهانة الحمار ...
لو هـ عيش أحارب علشان قضية واحدة هـ تبقى العنف الجسدى ...لا للعنف الجسدى حتى لو هـ يقع على حمار ..."يعنى أنا لو قلت ولا طبلة تعض كمانجة، ولا أقطع كوسة بسنجة ... أبقى شاعر خلاص"؟! – أحمد سعد.هل منطقى إن الكل بقى يقول كلام على الوزن واعتبر نفسه شاعر؟الشعر الوحش من مساوئ الثورة!بس برضه ...الثورة مستمرة.الخضوع للمجتمع!هل منطقى إن الشخص اللى ريقه نشف فى نشر فكرة عدم الخضوع للمجتمع هو اللى يلاقى نفسه مضطر يفكر زى مجتمعه؟!أنا بـ اتكلم عن نفسى ...المفروض أتجوز الشخص اللى بـ حس إنى على راحتى معاه، اللى أشوف إن كل رجال العالم جنبه ولا حاجة مش بس عاديين، اللى يرحينى، اللى يفهمنى، اللى يحبنى ويشوف إن كل نساء العالم جانبى ولا حاجة مش بس عاديين، مش اللى معاه أحسن شهادة وأضمن وظيفة وأحدث عربية وأكبر شقة!بس أنا مضطرة أخضع!هل منطقى إن الشخص اللى ريقه نشف فى نشر فكرة عدم الخضوع للمجتمع هو اللى يلاقى نفسه مضطر يفكر زى مجتمعه؟!أنا بـ اتكلم عن صاحبتى اللى قالت لى أنها ما ينفعش تشرب سجاير وهى ماشية فى الشارع
هى كمان مضطرة تخضع!رغم أى فكرة وأى محاولة وأى مبدأ ... أحيانا نضطر للخضوع!هل منطقى إن كل صاحب رأى يُحترم؟"أنا ممكن أحج من شباك البيت" – نوال السعداوىهل منطقى إن واحد ما يردش على واحدة بالأسبوع، والواحدة تفضل فاكرة إنه بس مشغول، مش إنه "مش مهتم" أو "خلاص ما بقاش مهتم" ؟كلنا فى الحب، ضعفاء وأغبياء! ... فهمنا وإدراكنا بـ يبقى أبطأ من المعدل الطبيعى فيما يخص استحالة أو إنتهاء العلاقة!هل منطقى إن واحدة تفضل تحب واحد سنين وهو مفيش؟ وتقابل ناس وتعرف ناس وتقرب من ناس وتصاحب ناس بس عايزاه هو! لأسباب هى أصلا مش عارفاها ومش موجودة؟فيه أوقات، بـ تبقى عايز تروح تسأل شخص معين: "يعنى إيه تشوفنى حلوة وتقول لى ده، ولطيفة، وتخرج معايا، وتصحينى من عز نومى علشان تحكى حاجات لأنك بـ ترتاح لى أنا، وتقول للناس قد إيه أنا حاجة تانية وقد إيه أنا غالية ... وما تحبنيش؟ انت ليه ما بـ تحبنيش، ليه ما تجربنيش؟"بس ما ينفعش ... لأن دى اسمها قلة قيمة!من نعم ربنا علينا إن الكلام اللى بـ نفكر فيه مش بـ يظهر فى شاشة على قورتنا."لولا كوبرى أكتوبر، كان زمانى عملت أول مليون" – وسام شريفهل منطقى إن مفيش أى حد ساهم بأى قانون ولا اقتراح لتقليل الزحمة دى؟"هل منطقى أنك تبقى قاعد وسط تجمع عائلى وتفضل ساكت لأنك مش عايز تشارك فى مواضيع غير مجدية ولأنك عارف ان كل وجهات نظرك لن تتفقك مع أى حد فيهم؟عيلتك هى اللى بـ تنتمى ليها بحكم شهادة الميلاد؟ ولا عيلتك هم الناس اللى فاهمينك وأنت فاهمهم؟"الكلام اللى ما تقدريش تقوليه فى وش حد، ما تقوليهوش من وراه" – أبويا
هناك تعليق واحد:
احببت فقط أن اضع تعليقاً على ذلك المقال الذى انتقلتى فيه بسرعة الطائرة النفاثة ما بين موضوع وآخر ولكن ما اود الاشارة اليه ان حالة الفصام والازدواجية التى سقط فى مستنقعها مجتمعنا وتلك الحالة العبثية من تفريغ الدين من مضمونه والاكتفاء بالشعائر وفقط دون ادنى نظر ان اى دين سماوى كان او حتى وضعى انما جاء لتهذيت السلوك الانسانى ... تلك الحالة لا يتحمل مسئوليتها الشعب وحده بل ومن ادخلوه فيها ايضاً ، فلا تنسى ان فى مصرنا الحبيبة ولسنوات طويلة لم تتم اى عمليه استثمار او تنمية فى هذا الشعب من الداخل ... فلا ينبغى ان نلوم المفعول به وننسى الفاعل .
تقبلى تحياتى
إرسال تعليق